***జర్నలిస్టుల రైల్వేపాస్ ల పునరుద్ధరణ ను రాజ్యసభ లో ప్రస్తావించిన ఎంపీ వద్దిరాజు…
***ఈనెల 24న రవిచంద్రకు టీడబ్ల్యూజేఎఫ్ వినతిపత్రం…
***రైల్వేమంత్రి అశ్వనీవైష్ణవ్ కు ఎంపీ వినతిపత్రం…
న్యూస్ 24అవర్స్ టివి-స్టేట్ బ్యూరో చీఫ్, 27.03.2025: తెలంగాణ వర్కింగ్ జర్నలిస్ట్స్ ఫెడరేషన్ (టీడబ్ల్యూజేఎఫ్) ఖమ్మం జిల్లా కమిటీ విజ్ఞప్తిని ఎంపీ వద్దిరాజు రవిచంద్ర రాజ్యసభ దృష్టికి గురువారం తీసుకెళ్లారు. రైల్వేలో కరోనా ముందు వరకు జర్నలిస్టులకు ఇచ్చిన 50 శాతం రాయితీని పునరుద్ధరించాల్సిందిగా ఎంపీ కోరారు. ఈ మేరకు టీడబ్ల్యూజేఎఫ్ ఈనెల 24న రాజ్యసభ, లోక్ సభ ఎంపీలు వద్దిరాజు రవిచంద్ర, రామ సహాయం రఘురాంరెడ్డిలకు ఆన్ లైన్ లో వినతిపత్రాలు పంపింది. ఈ విషయమై పార్లమెంటులో ప్రస్తావించడంతో పాటు రైల్వే శాఖ మంత్రి దృష్టికి సైతం తీసుకువెళ్లాల్సిందిగా టీడబ్ల్యూజేఎఫ్ ఖమ్మం జిల్లా కమిటీ ఫోన్ లో విన్నవించింది. దీనిపై ఇరువురు ఎంపీలు సానుకూలంగా స్పందించారు. కచ్చితంగా పార్లమెంటు దృష్టికి జర్నలిస్టుల రైల్వే పాస్ ల విషయాన్ని తీసుకెళ్తామని హామీ ఇచ్చారు. ఈ మేరకు వద్దిరాజు రవిచంద్ర రాజ్యసభలో గురువారం ప్రస్తావించారు. ఆ వెంటనే రైల్వే శాఖ మంత్రి అశ్వినీ వైష్ణవ్ కు సైతం వినతి పత్రం అందజేశారు. గతంలో అక్రిడేటెడ్ జర్నలిస్టులకు రైల్వేలో 50 శాతం రాయితీపై ప్రయాణించే సౌకర్యం ఉండేదని, దానిని కోవిడ్ లాక్ డౌన్ సందర్భంగా నిలిపి వేశారని తెలిపారు. తిరిగి రైలు రాయితీని పునరుద్ధరించాలని కోరారు. జర్నలిస్టులలో చాలా వరకు తక్కువ, మధ్య తరగతి ఆదాయ వర్గాలకు చెందిన వారేనని, తమ విధి నిర్వహణ లో భాగంగా ప్రతి నిత్యం రైళ్లలో ప్రయాణాలు చేస్తుంటారన్నారు. కోవిడ్ కారణంగా ఎత్తేసిన రాయితీ పథకాన్ని తిరిగి ప్రవేశపెడుతూ వారిపై ఆర్థిక భారం పడకుండా సాయం చేయాల్సిందిగా రైల్వే మంత్రిత్వ శాఖను కోరారు. రైలు ప్రయాణాల సందర్భంగా గతంలో మాదిరిగా 50 శాతం రాయితీని పునరుద్ధరించాల్సిందిగా పాత్రికేయులు, వారి సంఘాలు మూడేళ్లుగా కేంద్ర ప్రభుత్వానికి విజ్ఞప్తులు చేస్తుండడాన్ని ఈ సందర్భంగా ఎంపీ వద్దిరాజు గుర్తు చేశారు. ప్రజాస్వామ్య వ్యవస్థలో నాలుగో స్థంభంగా సమాజానికి తమ విలువైన సేవలందిస్తున్న జర్నలిస్టులకు రైల్వే టిక్కెట్లలో 50 శాతం రాయితీ కల్పించడమనేది సమంజసం, సముచితమని ఎంపీ రవిచంద్ర చెప్పారు. అలాగే, రాజ్యసభలో మాట్లాడిన తర్వాత ఎంపీ వద్దిరాజు రైల్వే మంత్రి అశ్వినీ వైష్ణవ్ ను పార్లమెంటులోని ఆయన ఛాంబర్ లో కలిసి ఈ మేరకు వినతిపత్రం అందజేశారు. ఆయన వెంటనే సానుకూలంగా స్పందిస్తూ అధికారులకు తగు ఆదేశాలిచ్చారు.
