[ad_1]
.WEBP)
తెలుగు చిత్ర పరిశ్రమను దశాబ్దాలుగా పట్టిపీడిస్తున్న పైరసీ భూతం సరికొత్త రూపంలో మళ్లీ పంజా విసిరింది. గతంలో సైబర్ క్రైమ్ పోలీసులు పకడ్బందీగా అడ్డుకుని మూయించేసిన టాలీవుడ్ మోస్ట్ వాంటెడ్ పైరసీ సైట్ ‘ఐబొమ్మ’ ఇప్పుడు సరికొత్త డొమైన్తో మళ్లీ పుట్టుకొచ్చింది. ఐబొమ్మతో పాటు ‘బప్పం టీవీ’ అనే మరో వెబ్సైట్ కూడా జతకలిసి సరికొత్త చిత్రాలను డిజిటల్ స్క్రీన్లపైకి తెస్తోంది. ఈ పరిణామంతో తీవ్ర దిగ్భ్రాంతికి గురైన తెలుగు చలనచిత్ర వాణిజ్య మండలి (ఫిలిం ఛాంబర్) హైదరాబాద్ సైబర్ క్రైమ్ పోలీసులకు అధికారికంగా ఫిర్యాదు చేసింది.
థియేటర్లలో విడుదలైన కొన్ని గంటల్లోనే కొత్త సినిమాలను, ప్రముఖ ఓటీటీ కంటెంట్ను ఈ సైట్లు అక్రమంగా స్ట్రీమింగ్ చేష్ట చిత్ర పరిశ్రమలో తీవ్ర భయాందోళనలకు గురిచేస్తున్నాయి. ఫిలిం ఛాంబర్ యాంటీ వీడియో పైరసీ సెల్ ఫిర్యాదు ఆధారంగా హైదరాబాద్ సైబర్ క్రైమ్ పోలీసులు రంగంలోకి దిగారు. ‘వాట్ ఈజ్ రివ్యూస్ బ్లాగ్ స్పాట్ డాట్ కాం’, ‘ఐబొమ్మమీడియా డాట్ కాం’ అనే వెబ్సైట్లను నడుపుతున్న గుర్తుతెలియని నిందితులపై క్రిమినల్ కేసులు నమోదు చేశారు.
ఈ కేటుగాళ్లు కేవలం సినిమాలను దొంగతనంగా ప్రసారం చేయడమే కాకుండా.. వాటి ద్వారా భారీ స్థాయిలో చట్టవిరుద్ధమైన ఆన్లైన్ బెట్టింగ్ వేదికలను కూడా ప్రమోట్ చేసినట్లు పోలీసులు పేర్కొన్నారు. తెలుగు, తమిళం, హిందీ, బెంగాలీ వంటి బహుభాషా చిత్రాలను ఉచితంగా అందిస్తూ.. వీక్షకులను ఆకర్షించడానికి ఐబొమ్మ, బప్పం లాంటి పాపులర్ పైరసీ బ్రాండ్లను వీరు వాడుకుంటున్నారు.
సాంకేతికంగా ఈ పైరసీ ముఠా చట్టాల కంటికి చిక్కకుండా అత్యంత అధునాతన వ్యవస్థను ఏర్పాటు చేసుకున్నట్లు దర్యాప్తులో తేలింది. గూగుల్ బ్లాగ్స్పాట్ ప్లాట్ఫామ్ను ఫ్రంట్-ఎండ్ పోర్టల్గా వాడుకుంటూ.. లోపల కస్టమ్ స్ట్రీమింగ్ ప్లేయర్లను అమర్చి ఎలాంటి అడ్డంకులు లేకుండా పైరేటెడ్ సినిమాలను ప్లే చేస్తున్నారు. సైబర్ పోలీసులు టెక్నికల్ అనలిస్టులు తమ సైట్లను ట్రాక్ చేయకుండా లేదా అడ్డుకోవడానికి వీరు ‘యాంటీ-ట్రాకింగ్’, ‘యాంటీ-డీబగ్గింగ్’ కోడింగ్ మెకానిజమ్లను కూడా వాడుతుండటం ఇండస్ట్రీ వర్గాలను ఆశ్చర్యపరుస్తోంది.
సినిమాల దొంగతనంతో పాటు సమాజానికి తీవ్ర హాని కలిగించే మరో కోణాన్ని కూడా ఈ వెబ్సైట్లో పోలీసులు గుర్తించారు. దేశంలో నిషేధించబడిన ఆన్లైన్ గ్యాంబ్లింగ్, బెట్టింగ్ అప్లికేషన్లను ఈ సైట్లు విపరీతంగా ప్రచారం చేస్తున్నాయి. వినియోగదారులు సినిమా చూసేటప్పుడు ఎవరైనా వీడియోను పాజ్ చేస్తే చాలు.. స్క్రీన్పై బెట్టింగ్ ప్రమోషన్లు ప్రత్యక్షమయ్యేలా వికృతమైన వ్యూహాన్ని అమలు చేస్తున్నారు. ఉచిత సినిమాల పేరుతో యువతను ఆన్లైన్ జూదం వైపు ఆకర్షించింది.. వారి జీవితాలను గుల్ల చేసే పెద్ద కుట్ర ఇందులో దాగి ఉందని సోషల్ మీడియాలో నెటిజన్లు ఆందోళన వ్యక్తం చేస్తున్నారు.
పరిస్థితి తీవ్రతను గమనించిన హైదరాబాద్ సైబర్ క్రైమ్ పోలీసులు నిందితులపై ఐటి యాక్ట్, భారతీయ న్యాయ సంహిత (బీఎన్ఎస్), తెలంగాణ గేమింగ్ యాక్ట్ కింద కేసులు నమోదు చేసి దర్యాప్తును ముమ్మరం చేశారు. కోట్లాది రూపాయల బడ్జెట్తో వందలాది మంది కార్మికుల శ్రమతో రూపుదిద్దుకునే సినిమా రంగాన్ని కాపాడుకోవడానికి ప్రభుత్వం మరిన్ని కఠిన చర్యలు తీసుకోవాలని సినీ ప్రియులు కోరుతున్నారు. ఈ కొత్త డొమైన్ల గుట్టును పోలీసులు ఎంత త్వరగా రట్టు చేస్తారో చూడాలి మరి.
[ad_2]
